Čorna Krušwa

Nazyma 2012. Jedna korčma w Berlinje-Friedrichshainje. Ludźi hraja billard, pija piwo a kurja. Uta a Paul wosrjedź toho. Rozmołwjetaj so. Wo trio mjenowany Čorna Krušwa.

Paul: Sy da hižo Jacke a Hannija do toho znała, prjedy hač hrajachmoj we Wojerowskej Kufje w nalěću 2008?
Uta: Ně, znajach jenož Jackoweho nana z Łužicy. Njebjelčicy wšak njejsu daloko wot Pančic. A ty?
Paul: Nóhaj, sym jónu z jednym z jich kumplow w Hospi w Zhorjelcu hromadźe rał. Dla toho ta connection do Wojerec. W Kufje sym potom Jacke zeznać wuknył, dokelž sym tam tehdy plakat za naju koncert w Berlinskim klubje Fischladen pójsnył a wón je mje serbsce narěčał.
Uta: Paulo, kak je ći było, hdyž smój jako Berlinska Dróha na RAK-zetkanju w Kielje 2010 hrałoj a tam naraz połojca wot Pla-Ro plus Marćinkof jako Čorna Krušwa tež zahraše?
Paul: Spodźiwnje někak. Sym so prašał, čehodla woni nětko hippie-hudźbu činja. Pla-Ro běše wšako super! Woprašach so jich potom tohodla, hač nochcejdźa z namaj do Pólskej sobu přińć.
Uta: To běše wulkotna ideja! Dopomnju so towa, zo sym była ten hnydom totalnje zahorita a namakach mysl jara zajimawu, kak to drje budźe: tura w Pólskej z dwějomaj serbskimaj skupinomaj a kak so to drje pólskemu publikumej lubić budźe. Hač ći ludźo něšto z tym serbskim započinać móža… a haj, wono bu jedna błudna, wurjadna tura.
Što je so tebi na našim zhromadnym turowanjom najlěpje lubiło? Ja měnju, dyrbiš tla potom 24 hodźinow, 10 dnjow dołho pornjo sebi wutrać. A štó by sej to wumyslił? Móžemy nětko hižo na tři zhromadne tury w Pólskej (2010, 2011, 2012) wróčo hladać.
Paul: Běše spěšnje widźeć, zo so to derje hromadźe hodźi. Sym wšak našu prěnju turu w “hundefängeru” wot Berlina do pólskeho Augustówa, kotraž běše woprawdźe prawy horrortrip, dokelž traješe něhdźe 9 hodźinow, z Jacke dožiwił. A tam mějachmoj dosć chwile, so přez Bóh tón knjez a dalše wěcy rozmołwjeć. Sym tež spěšnje pytnył, zo maja wurjadne začuće za hudźbu, tež hdyž hišće přeco skeptiski napřećo jich “schwiegermutterrockom” stejach. Jako pak so z nim zpřećelich, započinachu tež hnydom z punkrockom.
Uta: Nó tak, mi dźěše so podobnje. Tež w Marćinkofskim Opelu běše nahlada z Marćinkofom, Hannijom a Pjotrekom jara njenapjatna a zabawna. Mějach tež hnydom dobre začuće, zo su Jacke, Hanni a Marćinkof sympatiski trio. Sym přeco hišće wo tym přeswědčena: hdyž zrozumja so ći hudźbnicy tež priwatnje jara derje, potom činja tež wulkotnu hudźbu hromadźe. To hižo tehdy pola jich “schwiegermutterrocka”, potajkim jich spočatkow, pytnył sy. A mjeztym su so jasnje dale wuwili. Njepřindźe mi runje žana druha młoda band do mozow, kotraž je tak sympatiska, a nimo toho hišće tajku wulkotnu hudźbu čini. Hdyž słyšu dźensa Čornu Krušwu, dopomina mje to na ćopły psychedeliski rock z póznych šěsćdźesatych lět z pěknej bluesowej notu. A gitarje wotkupiš totalnje blues. Při tym piska basgitara jara melodisce z porjadnym funkowym groovom. A nahaj, Hanni je za prawy punkrock zamołwity. Abo widźu to pře kategorisce?
Paul: Tón punkrock nječini wón sam. Jackowa gitara dopomina mje hdys a hdys na Wipers abo Dackelblut. Grooviske basisty mějachu hižo tež druhe skupiny. Štož jich wosebite sčini, je, zo hraja so live wurjadnje hromadźe. A “lubosć” je woprawdźity hit! Sym jara wčipny, kak z nimi dale póndźe. Zahori mje tež, kak konsekwentje woni su, hdyž wo hudźbu dźe. Hotowe a droje studijowe nahrawanja preč zmjetać, dokelž je so band dale wuwiła – wótra wěc!
Uta: Nó, to móžu jenož přihłosować, woprawdźe twjerde.
Hej Paulo, napadnje ći póprawom: wuzběhnjemoj Čornu Krušwu do njebjes, do serbskich njebjes. Čorna Krušwa je kaž parlička, kotraž so na serbskim hudźbnym firmanenće błyšći. Zo dźě tajke něšto scyła dawa, mje zwjeseli: młodźi ludźo ze serbskim pozatkom, kotřiž přećahnu jich wěc, wšojednje što přińdźe. Kotřiž so plakatiwnje jako serbska band njeprezentuja, z dobom pak korjenje njeprěja.
Paul: Myslu sej, směmoj jich do njebjes zběhać. Čehodla nic? Snano dyrbimy samo naše woči začinić a jedyn “słódki són” sonić: njebjo je połnje małych mróčelkow. Mjez nimi leća tři hólcy z instrumentami. Punkrock dešćuje so na delka na łukach stejacych ludźi z wokolnych wjeskow. Dźiwaja so, zmoknu a započinaja rejować. Dospołnje błóćane hibaja so rejujo na směr Budyšin. Wóše nich zlětuje dale trio a spěwa wo “lubosći” a “nadźiji”. W Budyšinje powodźeja Židow a Bohatu hasu. Hudźbnicy sydnu so na Bohatu wěžu, kotraž wokoło padnje. Nichtó so njezrani a band hraje dale…
Uta: …dale, dale, přeco dale!!!

Berlin, w oktobrje 2012

glosar:
Jacke: Jakub Čornak, e-gitara, spěw – Čorna Krušwa
Hanni: Johannes Kruscha, bijadło, spěw – Čorna Krušwa
Marćinkof: Martin Kunath, basgitara – Čorna Krušwa
Hospi: Zhorjelski klub
Kufa: Kulturfabrik, Wojerecy
RAK: Rotzfreche Asphaltkulur
Pla-Ro: Plattenbau Romantik, něhdyša band wot Jacke a Hannija
Pjotrek: pólski přećel a turowy manager Čorneje Krušwy a Berlinskeje Drohi
Wipers: ameriska punkrockowa band
Dackelblut: Hamburgska punkrockowa band

Share and Enjoy:
  • Twitter